बन्द खुले लगत्तै चितवनमा मोबिल बोकेको ट्रकमा आगजनी

चितवन, पुस २- तरुण दल चितवनले आफ्ना नेता शिव पौडेलको मृत्यु भएको विरोधमा गरेको चितवन बन्द खुले लगत्तै शनिबार साँझ एक ट्रकमा अज्ञात समूहले आगजनी गरेको छ। आगजनीबाट मोबिल र ग्रीज बोकेको ट्रक जलेर पूर्ण रुपमा नष्ट भएको चितवन प्रहरीले जनाएको छ।
इटहरीबाट नारायणगढ आउँदै गरेको ना २ ख १५९७ नम्वरको ट्रकमा मोटरसाइकलमा आएका तीन जनाको एक समूहले भरतपुर ९ आस्था चोकमा आगो लगाएको प्रहरीको भनाई छ। उनीहरुको भने पहिचान भएको छैन।

आगो प्रहरी, स्थानीयबासी र दमकलले नियन्त्रणमा लिएको थियो। आगो लगाउने समूहको खोजी भैरहेको प्रहरीले जनाएको छ। सो क्रममा भाग्न लाग्दा चालक र सहचालक सामान्य घाइते भएको प्रहरीले जनाएको छ।