३८ औषधी पसल बन्द जारी, बिरामी अप्ठ्यारोमा

तरुण दलका सुनसरी उपसभापति प्रविण राईले सार्वजनिक स्थलमा एक औषधी व्याबसायीलाई आक्रमण गरेपछि बीपी कोइराला स्वास्थ्य विज्ञान प्रतिष्ठान अगाडि रहेका सबै औषधि पसल आइतबार पनि बन्द रहेका छन् ।

औषधी व्याबसायीहरुले सुरक्षाको माग गर्दै बन्द गरेका छन् । प्रतिष्ठान अगाडिका ३८ औषधी व्याबासायीहरुले सामुहिक रुपमा औषधी पसल बन्द गरेपछि प्रतिष्ठानमा उपचार गर्न आउने विरामीलाई औषधी किन्न अप्ठ्यारो परेको छ ।

विपि प्रतिष्ठानको मुख्य प्रवेश द्वारअगाडि रहेको अनिता मेडिकल सञ्चालक वीरेन्द्र गुप्तालाई राईले शनिबार कुटपिट गरेकोले दोषीमाथि कानुनी कारवाही गर्न पर्ने माग गरेको घोष औषधी व्याबसायी संघका सचिव सुवास पौडेलले बताए । उनले औषधी पसल आज खोल्ने नखोल्ने भन्ने बारे औषधी व्याबसायीहरुको भेलाले निर्णय गर्ने बताए ।

प्रतिष्ठानमा दैनिक तीन हजार भन्दा बढी विरामी र उपचार गर्न आउने गरेका छन् भने अस्पताल भित्र विभिन्न रोगबाट ग्रसित सात सय बढी विरामी भर्ना भएका छन् । अस्पताल भित्र रहेको लाइफ केयर औषधी पसल भएपनि ६० प्रतिशतले प्रतिष्ठान बाहिरको पसलबाट औषधी लैजाने गरेका छन् ।

अनिता मेडिकल गैरकानुनीरुपमा सञ्चालन भइरहेको विषयलाई लिएर तरुण दल सुनसरी–१ क्षेत्रीय समितिले चार दिन अघि तालाबन्दी गरेको थियो । तालाबन्दीपछि औषधि व्यवस्था विभागले अनुगमन गरी अनुमति लिने व्यक्तिको उपस्थितिमा मात्र पसल सञ्चालन गर्न दिने जनाएको थियो ।

अनिता मेडिकलका संचालक भोला गुप्ता आएपछि प्रहरी र तरुण दलका सुनसरी–१ का क्षेत्रीय सभापति तिलक राईको टोलीले ताला खोलेको थियो । ताला खोली सकेपछि आएका तरुण दलका अर्को उपसभापति प्रविण राईले ‘मलाई नसोधी पसल किन खोलेको’ भन्दै आफुमाथि आक्रमण गरेको पीडित वीरेन्द्र साहले बताए ।