चिनियाँ अभियुक्तहरूलाई अदालतबाटै भगाउन खोजिएको थियो’

भक्तपुर, पुस २७ - अवैध डलर कारोबारमा संलग्न रहेको अभियोगमा पक्राउ परेका चिनियाँ नागरिकहरूलाई तिनका सहयोगी समूहले जिल्ला अदालतबाटै भगाउन खोजेको प्रारम्भिक अध्ययनबाट खुलेको छ । भक्तपुर प्रहरीले आफ्नो केन्द्रीय निकायलाई पठाएको प्रतिवेदनमा राजस्व अनुसन्धान विभागले म्याद थप्न अदालत ल्याउँदा परिसरबाटै उनीहरूलाई भगाउने योजना रहेको पाइएको उल्लेख छ ।

शरीरको विभिन्न भागमा लुकाएर चीनतर्फडलर लैजान लागेको आरोपमा १० चिनियाँ र तीन नेपाली शनिबार भक्तपुरको जगातीबाट पक्राउ परेका थिए । उनीहरूलाई अनुसन्धानका लागि म्याद थप्न सोमबार अदालत लगिएको थियो । अदालतले ७ दिनको म्याद थप गरेपछि आक्रोशित भएका चिनियाँ नागरिक तत्काल तोडफोडमा उत्रेका थिए । तोडफोडबाट टेबल र झ्यालका सिसा फुटेका छन् । पक्राउ परेका चिनियाँका ३५ भन्दा बढी सहयोगीले अदालतमा ढुंगा प्रहार गरेका थिए । थुनुवालाई भगाउन नपाएपछि बाहिर गएर ढुंगा हानेको प्रत्यक्षदर्शीले जनाए । थुनुवाका सहयोगीले अदालतमा होहल्ला गरी म्याद थप गर्न ल्याएकालाई लैजाने तयारीसाथ आएको प्रहरीले जनाएको छ । अभियुक्तहरूलाई केन्द्रीय कारागारबाट सशस्त्र प्रहरीले अदालत पुर्‍याएको थियो । 'उनीहरूलाई अदालतमा ल्याएको थाहा पाएपछि ७र८ ट्याक्सीमा ३५ भन्दा बढीको चिनियाँ नागरिक अदालत परिसर छिरेर सुरक्षाकर्मीको नियन्त्रणमा रहेको थुनुवालाई आफ्नो नियन्त्रण लिई लैजाने प्रयास गरेका थिए,' भक्तपुर प्रहरीले केन्द्रीय निकायमा पठाएको प्रतिवेदनमा भनिएको छ । उनीहरूलाई म्याद थप्न अदालतमा ल्याउनेबारे परिसरलाई पूर्वजानकारी नभएको पनि जनाइएको छ । प्रहरी कार्यालय नजिकै भएकाले उनीहरूको योजना विफल भएको एक प्रहरी अधिकृतले जनाए । थुनुवालाई सशस्त्र प्रहरी बलको सुरक्षा घेरामा अदालत लगिएको थियो ।

हतकडी नलगाई ल्याएकाले म्याद थपको विरोधमा अदालतमा तोडफोड गर्न सजिलो भएको प्रत्यक्षदर्शी अधिवक्ता प्रभाकर खनालले बताए । ुउनीहरूलाई गाइड गर्ने व्यक्तिको अभाव र भाषा अर्को समस्या हो,' उनले

भने । नेपाल बार एसोसिएसन, भक्तपुर इकाईको बैठकले थुनुवा र सहयोगीहरूबाट अदालतमा भएको तोडफोडको भत्र्सना गरेको छ । जिल्लाका सुरक्षा निकाय प्रमुख, बार पदाधिकारी, न्यायाधीशहरू र कर्मचारीले मंगलबार अदालतमै बसेर घटनाको समीक्षा गरेका

थिए । त्यसपछि न्यायाधीशद्वय रामप्रसाद ओली, राजुकुमार खतिवडा, प्रजिअ केशवराज आचार्य, एसपी नारायणसिंह खड्का, राष्ट्रिय अनुसन्धानका जिल्ला प्रमुख हुतराज थापा, बारका पदाधिकारीलगायतले तोडफोड भएको कोठा अवलोकन गरेका थिए ।

राजस्व अनुसन्धान विभागले पक्राउ परेका तीन नेपाली चालकको मंगलबार बयान लिएको छ । 'बयान लिन सुरु गरेका छौं, पहिलो दिन उनीहरू चढेको गाडीका चालकलाई सोधपुछ गर्‍यौं,' विभाग स्रोतले भन्यो । चालकहरूले भाडा आउने भएपछि चिनियाँ नागरिकलाई तातोपानीसम्म लैजान लागेको बयान दिएका छन् ।