अनाधिकृत रुपमा खोलिएको क्रसर उद्योग बल प्रयोग गरेर भए पनि हटाउने धादिङका प्रमुख जिल्ला अधिकारी नारायणप्रसाद आचार्यको भनाई

धादिङका प्रमुख जिल्ला अधिकारी नारायण प्रसाद आचार्यले अनाधिकृत रुपमा खोलिएको क्रसर उद्योग बल प्रयोग गरेर भए पनि हटाइने बताउनु भएको छ । त्रिशुली किनार र आसपासका क्षेत्रमा अनाधिकृत रुपमा क्रसर उद्योगहरु खुल्न थाले पछि जिल्ला विकास समिति धादिङको आयोजनामा ढुङ्गा गिटी बालुवा व्यवस्थापन तथा आपसी सहयोग र सहकार्यका लागि आज बैरेनीमा आयोजित अन्तरकि्रया कार्यक्रममा उहाँले सो कुरा बताउनु भएको हो ।

अनुगमन समितिका संयोजक समेत रहनुभएका आचार्यले कसैले पनि मेसिन प्रयोग गरि त्रिशुलीबाट ढुङ्गा गिटी बालुवा झिक्न नपाउने भन्दै कानुनलाई पालना गर्न व्यवसायीहरुलाई आग्रह गर्नुभयो ।

सोहि अवसरमा बोल्दै त्रिशुली बचाउ साझा साजालका संयोजक उत्तम कँडेल र सदस्य जगन्नाथ नेपालले त्रिशुली दुईचार जना क्रसर व्यावसायीहरुको मात्र नभएको भन्दै वालुवा गिटी ढुङ्गा प्रशोधन उद्योग हटाउन प्रसासन संग माग गर्नु भएको थियो । कार्यक्रममा व्यवसायी पुष्प थपलिया रामहरी थापा लगायतले करोडाँै लगानी गरिएको क्रसर उद्योगबाट ५ हजार मजदुरले प्रत्यक्ष रोजगारी पाएको भन्दै हटाउने निर्णय नगर्न अनुरोध गरेका थिए ।

कार्यक्रममा एकिकृत नेकपा माओवादी धादिङका सहइन्चार्ज रामबहादुर भण्डारी एमाले धादिङका अध्यक्ष गुरुबुर्लाकोटी नेपाली काँग्रेसका जिल्ला सभापति रामनाथ अधिकारी माओवादीका ताम्सालिङ राज्य समिति सदस्य धुब्र सुवेदी सहित विभिन्न राजनीतिक दल र संघ-संस्थाका प्रतिनीध तथा साचारकर्मीहरुको उपस्थिति थियो । त्रिशुली किनारमा साना ठुला गरी १ सय ३० ढुङ्गा गिटी बालुवा प्रसोधन उद्योगहरु संचालनमा छन् । यसबाट जिल्ला विकास समिति धादिङले वार्षिक १० करोड राजस्व उठाउने गरेको छ ।

रेडियो बिहानी, धादिङ ।