प्रधानन्यायाधीशले नै भने- 'न्याय प्रणाली चुस्त छैन'

प्रधानन्यायाधीश खिमराज रेग्मीले दक्ष कमचारीको अभावले गर्दा मुलुकको न्याय प्रणाली चुस्त नरहेको स्वीकार गरेका छन्। प्रधानन्यायाधीशले न्यायमा जनताको पहुँच वृद्धि गर्न कानुनी प्रक्रियामा नै सुधारको आवश्यकता औंल्याएका छन्। न्यायपालिकालाई निस्पक्ष बनाउन सकेमा जनताका कामहरु छिटो र छरितो सम्पादन गर्न सकिने उनको भनाइ थियो।



नेपाल पत्रकार महासङ्घ पाल्पा शाखाको आयोजनामा तानसेनमा आज बिहान सम्पन्न पत्रकारसम्मेलनमा प्रधानन्यायाधीश रेग्मीले भने- 'न्याय प्रणालीमा माग अनुसारको बजेटको अभाव, प्रहरी अनुसन्धानमा ढिलाइ र साक्षी प्रक्रियाले गर्दा न्यायपालिकाले जनताका काम छिटो छरितो गर्न नसकेको हो।'
अदालतले देश र जनताको पक्षमा जवाफदेही बन्न सकेमा न्याय प्रणालीप्रति जनताको विश्वास बढ्ने उनको भनाइ थियो।

राजनीतिक आधारमा रहेर नभई संविधानको मर्म र भावनाअनुसार सर्वोच्च अदालतले फैसला गर्ने गरेको उल्लेख गर्दै उहाँले न्याय प्रणालीमा सुधार गर्न निस्पक्षता र इमान्दारीताको खाँचो रहेको छ भन्नुभयो।