पहिलो महिला प्रधानमन्त्री बन्छु : सुजाता

पुस ७- नेपाली कङ्ग्रेसकी नेतृ सुजाता कोइरालाले देशको पहिलो महिला प्रधानमन्त्री बन्न आफ्नो दावेदारी रहेको बताएकी छिन्। पार्टीको विधि, प्रक्रिया र नियमविपरीत जसले पनि प्रधानमन्त्री दावी गर्न पाउने भए आफ्नो पनि दावी रहने उनले स्पष्ट गरेकी हुन्।

कङ्ग्रेसको भ्रातृ संगठन नेपाल प्रेस युनियन, सुनसरीद्वारा आज बिहान आयोजित पत्रकार सम्मेलनमा कोइरालाले भनिन्- 'संसदीय दलका नेता प्रधानमन्त्रीको उम्मेदवार हुन्छ। पार्टीको विधानमा त्यही छ।'

उपसभापति रामचन्द्र पौडल र वरिष्ठ नेता शेरबहादुर देउवाबीचको अहिलेको विवाद प्रधानमन्त्रीको कुर्सीकै लागि भएको उनको जिकिर थियो। 'यही विवाद कै कारण कङ्ग्रेसको नेतृत्वमा सरकार बन्ने संभावना टर्दै गएको छ,' कोइरालाले भनिन्, 'अब अरु नै पार्टीको नेतृत्वमा राष्ट्रिय सहमतिको सरकार बन्नसक्छ।'